Luke 9

Jisas Ndi, Elim Nga Kitip Kᵾni Wu 12 Ni Kᵾⱡ Kongun Ngurum

1Wote Jisas ndi, kitip kᵾni wu 12 kat wi ropa, rᵾk tᵾpa mondpa kᵾn, elim nga ronduⱡ ei, wu kᵾⱡ ngumba, mek andᵾk, kui elpa elpa petᵾm wamp mbᵾ, etᵾk tᵾk, wote wamp mat, kur kit rukᵾr orunga morum mbᵾ, tᵾk mundeing nimba ronduⱡ ei, ngurum ku. 2Wote Jisas ndi, kitip kᵾni wu ni kᵾⱡ, tᵾpa mundpa, Got nga wamp tᵾpa mumuk rui uⱡ ei nga ik mbo endᵾk, kui peng em wamp mbᵾ, etᵾk tᵾk, iteing pᵾi nitim. 3Jisas ndi, wu ni kᵾⱡ, kundpa nimba mel, “Enim nde pᵾiya ᵾpᵾⱡ na, wal na, rᵾng na, ku moni na, wote wal pᵾki na kat, pendᵾk mek pi nᵾpᵾi, mon! 4Enim pangina kᵾn, rawe etᵾk tᵾng mang kona ila ik mbo endᵾk, pek molk kᵾn, wote kona tila ku pᵾi! 5Enim kona peng tila pangina kᵾn, wamp mbᵾ ndi, enim numan nguk ti natᵾng ndam, kona peng ei, wak rok kelik pᵾi! Wote, ping etᵾk kᵾn, wamp kᵾⱡ nga uⱡ kit etmin mbᵾ, ora nduk kᵾn, enim nga kᵾmp mbila, kᵾnggᵾpᵾn moⱡum mbᵾ, ndanda nduk, tek pᵾi!” nitim.

6Wote, kitip kᵾni wu nimbᵾ, kona elpa elpa ni mbila puk, Rᵾnang Ik Kai ei, wamp mbᵾ kᵾn mbo endᵾk, kui peng itim wamp mbᵾ, etᵾk tᵾk etᵾng.

Erot Ndi, Jisas Wu Nam Nda Nimba Pitim.

7Ui ni kᵾn, Jisas ndi, uⱡ ronduⱡ mat itim nimbᵾ nga timan ik ei, wamp kandrᵾng mbᵾ ndi, wu nuim Erot kundᵾk nᵾtᵾng. Wote, Erot numan ou ndupa pitim. Ei nambuⱡ emel, wamp mat ndi, nᵾk mel, “Jon wamp nu tindi wu ni koⱡpa, tikil rom,” nᵾtᵾng. 8Wote, wamp mat ndi, nᵾk mel, “Elaija kurum wu ni, tikil ropa om,” nᵾtᵾng.

Wamp mat ndi, nᵾk mel, “Painui wu unt korung nimbᵾ nga ti, tikil ropa yant om,” nᵾtᵾng. 9I nᵾtᵾng ila, wote Erot ndi, nimba mel, “Jon wamp nu tindi wu ei, na ndi, nil mba rok, nuim kan puⱡa rorung ni ka! Akup wu ti, kongun ronduⱡ mat, enim ninmin pᵾnt ei, wu nam nda?” nitim. Nimba kᵾn, Jisas kandᵾⱡmba ndam, pᵾp nimba pitim.

Jisas Ndi, Wu 5,000 Rᵾng Itim

10Nombuⱡa rung wu kongun iting purung nimbᵾ, yant ok, enim etᵾng uⱡ mbᵾ mel, Jisas kondᵾk nᵾtᵾng. Wote Jisas ndi, wu nimbᵾ, tᵾpa mepa wamp morung mbᵾ, wak rok enmin mint, kona peng tila purung. Kona peng ei, mbi tek, Betseita nᵾtmin. 11Wote, wamp nimbᵾ ndi, pilik kᵾn, Jisas ni purum ila, akil tek pep rok puk, Jisas kandᵾk tᵾtᵾng. Jisas ndi, wamp mbᵾ kandpa, rawe etpa tᵾpa kᵾn, kui rurum wamp mbᵾ etpa tᵾpa, Got nga wamp tᵾpa mumuk rui uⱡ ei nga ik mbo inditim.

12Epindama ant mana mba elinga kᵾn, kitip kᵾni wu 12 ni kᵾⱡ ok, Jisas murum ila kundᵾk, nᵾk mel, “Nim ndi, wamp mbᵾ nᵾkᵾn mundana, ant ei pendᵾk puk, rᵾng nuing mat kandᵾk tᵾk, ur pek iting kona mat, kandᵾk tᵾk iteing. Ya tᵾn mormᵾn kona ei, kui waka kona ila mormᵾn,” nᵾtᵾng. 13Wote Jisas ndi, kitip kᵾni wu ni kᵾⱡ kundpa, nimba mel, “En enim ndi, wamp mbᵾ, rᵾng mat kandᵾk tᵾk ngᵾi!” nitim. Wote, wu ni kᵾⱡ ndi, nᵾk mel, “Tᵾn rᵾng ou ndupa, tep muⱡi nambᵾrmᵾn mon! Bret tᵾmbᵾkak pᵾmp ti, gul tepa, oma raⱡ tepa etᵾm ei ka! Wamp rᵾⱡaip mam ei nga rᵾng nuing kᵾⱡ, tᵾn ndi, nil mbun rarᵾp rᵾmin nᵾk nᵾn?” nᵾtᵾng. 14Wu 5000 mel mormin ei ka! Wote Jisas ndi, kitip kᵾni wu ni kᵾⱡ kundpa, nimba mel, “Enim ndi, wamp mbᵾ, numa pana mbila, 50 nᵾk mᵾk elpa elpa rok, muⱡeing nᵾk kundᵾk nᵾi!” nitim. 15Wote, kitip kᵾni wu ni kᵾⱡ ndi, Jisas nitim uⱡ ni mel etᵾk, wamp mbᵾ 50 nᵾk mou rok, elpa elpa mondrung. 16Wote Jisas ndi, bret 5 ni kᵾⱡ kᵾn, oma ni raⱡ kᵾn, tᵾpa ambuⱡpa moⱡpa, oⱡa ndupa, muⱡ ila kandpa, Got kᵾn angge nimba atinga rurum. Wote Jisas ndi, bret na, oma na nimbᵾ, kᵾmp tᵾpa, elim nga kitip kᵾni wu ni kᵾⱡ nguⱡnga, wu ni kᵾⱡ ndi, mek andᵾk, wamp nimbᵾ, mok rok ngurung. 17Wamp nimbᵾ pora, rᵾng noⱡina, pᵾlᵾng elinga, mana titim nimbᵾ tᵾk, kowa wal 12 rakᵾlᵾk peka rondrung.

Pita Ndi, Jisas Nga Nimba Mot Ndurum

18Wote, ui ti kᵾn, Jisas elim mendpᵾⱡ atinga ropa moⱡnga kᵾn, wote elim nga kitip kᵾni wu ni kᵾⱡ orung. Jisas ndi, wu ni kᵾⱡ waldpa nimba mel, “Wamp mbᵾ ndi, na kundᵾk wu nam ninmin nda?” nimba wuldᵾtᵾm. 19Wote, kitip kᵾni wu ni kᵾⱡ ndi, punt rok nᵾk mel, “Wamp mat ndi, nim kundᵾk, Jon wamp nu tindi wu ei nᵾtmin. Wamp mat ndi, nim painui wu Ilaija, nᵾtmin. Wamp mat ndi, nim painui wu unt ti kolkᵾn, tikil rokᵾn, yant okᵾn morᵾn nᵾk, nᵾtmᵾn!” nᵾtᵾng. 20Wote Jisas ndi, wu ni kᵾⱡ, waldpa nimba mel, “Wote enim ndi, na kundᵾk, wu nam nᵾtmin?” nitim. Ei nga, Pita ndi, punt ropa nimba mel, “Nim Kraist, Got elim nga wamp mbᵾ, etᵾk rukᵾr tindin nimba kᵾn, tᵾpa mundrum wu ei ka!” nitim.

Jisas Elim Nga Mindil Nomba Koⱡmba Ei Nga Nitim

21Wote Jisas ndi, elim nga kitip kᵾni wu ni kᵾⱡ, ronduⱡ mundpa, kundpa nimba mel, “Enim ndi, na Kraist Got nga ngurum wu ei nᵾk, wamp mbᵾ kundᵾk, ni nᵾnᵾi mon!” nitim. 22Wote Jisas ndi, nimba mel, “Muⱡᵾl Wu Kupa ei, manga wingti rᵾp wu na, wu pris kuimbal na, mi ik mbo wu na mbᵾ ndi kandᵾk, tᵾk mbᵾⱡ ngangina, ama mindil ou ndupa nomba, wote koⱡmba. Wote, rumbᵾⱡ raldika omba pangga, ⱡoporpa tᵾpa, kont mondᵾmba,” nitim. 23Ni kᵾn, Jisas ndi, elim nga kitip kᵾni wu kᵾⱡ kᵾn, wamp morung nimbᵾ pora, kundpa nimba mel, “Wamp nam ti, na kᵾn pep rop uimp nimba, pilim ndam, elim nga numan orunga mana ndupa, ui mbila rᵾk rᵾk, elim nga nde peta ei, koma ropa mepa, na kᵾn wangga! 24Wote, wamp nam ti ndi, elim nga kᵾng orunga nga mint nimba pilim ndam, kont mba mul uⱡ ei, wak romba. Wote, wamp nam ti ndi, na nga nimba pilpa, elim nga kᵾng orunga pili napilim ndam, wamp ei kont mba mul uⱡ ei kapⱡa tᵾmba. 25Wote, wamp nam ti ndi, mᵾi kona mel mbᵾ nga kapⱡa itangga, kont mba mul uⱡ ei, wak rom ndam, mᵾi kona mel mbᵾ ndi, elim tᵾpa rapᵾndᵾmba mel nant? 26Wote, wamp nam ti ndi, na kᵾn kep, na nga ik mbo endint mbᵾ nga pipil kuⱡᵾm ndam, Muⱡᵾl Wu Kupa ei wakᵾt, Got nga uⱡ eng nui pol mbila moⱡpa, kopa pol ila anggelo wingti mbᵾ kᵾn, yant ong ei kᵾn, Muⱡᵾl Wu Kupa ei ndi, wamp ei kᵾn pipil ku kuⱡmba. 27Wote Jisas ndi, wamp mbᵾ, kundpa nimba mel, ‘Enim ik kupa ei kundᵾp nᵾnt. Ya ila mormᵾn wamp mbᵾ nga mat, kuⱡi nalk, kont molk kᵾnangina, Got nga wamp tᵾpa mumuk romba uⱡ ei kᵾning,” nitim.

Jisas Nga Kᵾng Kᵾⱡ Rᵾⱡang Puⱡnga Kandrᵾng

28Jisas ik kᵾⱡ nilinga, wote rumbᵾⱡ 8 omba purum. Ni kᵾn, Jisas ndi, Pita, Jon, Jeims kᵾⱡ tᵾpa mepa, wi komnga ila, atinga ruing pilik purung. 29Wote, Jisas elim atinga ropa murum nila, Jisas nga kuimp keta ei, ti elpa mel titim. Wote, wal pᵾki pᵾkrᵾm nimbᵾ, rᵾⱡang mba eng minal nurum. 30Ni kᵾn, tᵾngᵾnda mint, wu raⱡ okᵾⱡ, Jisas kᵾn ik nᵾtᵾnggil. Wu raⱡ, Moses kᵾn Ilaija raⱡ, Got nga rᵾⱡang ila molk okᵾⱡ, Jisas kᵾn ik nᵾtᵾnggil. Ik nᵾtᵾnggil mbᵾ, Jisas wi Jerusalem kona peng ou ila moⱡpa, kongun etpa, wote mᵾi ei, wak ropa mba etmba, uⱡ mbᵾ mel rak nduk molk nᵾtᵾng. 32Wote, kitip kᵾni wu Pita, Jon, Jeims ni kᵾⱡ, ur petᵾng ei mel, rut nᵾk kandrᵾng mel, Jisas ni, elim nga rᵾⱡang ila, wu raⱡ kᵾn kunda, anggilik morung. 33Wu ni raⱡ ndi, Jisas wak rokᵾⱡ puⱡᵾnggila kᵾn, Pita ndi, Jisas kundpa, nimba mel, “Wu Nuim ye! Tᵾn ya kona ila ombᵾn moⱡmᵾn ei, uⱡ kai ti imᵾn. Tᵾn ndi, muⱡ manga raldika kat rᵾkamᵾn, ti nim nga, ti Moses nga, ti Ilaija nga,” nitim. Pita nitim ik ni, pilpa kun iti natᵾpa, nitim. 34Pita ndi, ik nimba moⱡnga mel, kona kopa kat ndi, mana omba, wu kᵾⱡ tᵾpa kum roⱡnga, wu kᵾⱡ mundmong etᵾng. 35Wote, kona kopa kᵾⱡ nga rukᵾr ila ik ti, ekit ndupa nimba mel “Ya wu ei, na nga kangᵾm ei, na nga kongun indangga nᵾmp tᵾp mundᵾr ei nga ik nim ei, kum tek pilᵾi!” nitim. 36Wote, ik nimba pora nduⱡnga, kandrᵾng mel, Jisas ni, elim kou murum. Wote, wu ni kᵾⱡ ndi, uⱡ itim kandrᵾng nimbᵾ, wamp na ti kundᵾk ni nandᵾk, pilik rukᵾr nduk morung.

Jisas Ndi, Kur Kit Murum Kang Ti Etpa Titim

37Wote mᵾkᵾlmᵾ orunga, Jisas kᵾn, elim nga kitip kᵾni wu ni kᵾⱡ kᵾn, komnga mong ni, wak rok oⱡungina, wamp puⱡi ok, Jisas kandᵾk tᵾtᵾng. 38Wamp morung rᵾk ting nila wu ti ndi, Jisas kᵾn ronduⱡ wi ropa nimba mel, “Ik Mbo Wu ye! Na nga kang tenda waⱡᵾm ei, nim kᵾnᵾn nᵾmp nᵾnt ei ka! 39Kur kit ei ndi, omba rorum ei kᵾn, tᵾkrᵾpa mint ronduⱡ ke nimba, kᵾng mbᵾ purpur ropa, keta paip mepa etᵾm. Kur kit ei ndi, kang ei nga rukᵾr orunga moⱡpa, kang ei etpa mindil kundpa, wak rui narᵾrᵾm. 40Wote na ndi, nim nga kitip kᵾni wu kᵾⱡ ndi, kur kit ei, tᵾk mundeing nᵾmp kundᵾp nit ei, wote wu kᵾⱡ ndi, nᵾk tᵾk munding mel kapⱡa mon!” nitim.

41Ik nitim ni, Jisas ndi, pilpa kᵾn, wamp nimbᵾ, kundpa nimba mel, “Enim wamp mbᵾ nga mondpa pili ei, kapⱡa mon. Wote, pilpa kungᵾndi kun kai ti mon ku. Na enim kᵾn moⱡᵾp, ik mbo endᵾp namba iti ent. Ui namba iti na ndi, enim nga mbun koma rundimp nda? Nim nga kangnᵾm ei, mekᵾn na kᵾn ui!” nitim. 42Wote, kang ni mepa, Jisas murum nila oⱡina kᵾn, kur kit ni ndi, Jisas kandpa kᵾn, tᵾngᵾnda mint kang ni, ropa munduⱡnga, mᵾi ila pepa purⱡi marⱡi ᵾndrᵾm. Wote Jisas ndi, kur kit ni, ik mura ngumba tᵾpa mundpa, kang ni etpa tᵾpa tipam ni ngurum.

Jisas Ni, Elim Koⱡmba Uⱡ Ei Nga Aldpa Nitim

43Jisas ndi, Got nga ronduⱡ ila uⱡ itim ei, wamp mbᵾ kandᵾk, min ngᵾn mundrᵾng. Wote, wamp nimbᵾ ndi, Jisas nga itim uⱡ nimbᵾ nga, numan ou nduk pilik moⱡina kᵾn, Jisas ndi, elim nga kitip kᵾni wu ni kᵾⱡ, kundpa nimba mel, “Na nga nimp ent ik kᵾⱡ, kum tek pilik kai itᵾi! Wu mat ndi, Muⱡᵾl Wu Kupa ei, tᵾk wu mat ngangina, rok kunding,” nitim. 45Wote, kitip kᵾni wu ni kᵾⱡ ndi, Jisas nitim ik ei nga puⱡi ei, pilik kun iti natᵾtᵾng. Ei nambuⱡ emel, ik puⱡ ei, mo ropa pitim. Wote, wu kᵾⱡ ndi, Jisas wuldᵾng ei nga mundmong etᵾng.

Wu Nuim Kuimbal Ei Nam Moⱡmba

46Ui ti kᵾn, Jisas nga kitip kᵾni ni kᵾⱡ, ik rombulk nᵾk mel, “Wu kuimbal nam moⱡmba nda?” nᵾtᵾng. 47Wote Jisas ndi, kitip kᵾni wu kᵾⱡ nga numan pendᵾk morung nimbᵾ, kandpa pora ndupa kᵾn, kangambuⱡa kel ti, tᵾpa mepa omba, elim murum kona nila mondpa, elim nga kitip kᵾni wu kᵾⱡ kundpa nimba mel, “Wamp nam ti, na nga mbi ila kangambuⱡa kel ei, numan ngumba, rawe etpa tᵾm ndam, na rawe etpa tᵾmba. Wote, wamp nam ti, na rawe etpa tᵾm ndam, na tᵾpa mundrum wu ei, rawe etpa tᵾmba ku. Wamp nam ti, kangambuⱡa kei raⱡpa moⱡum wamp ei, nuim moⱡmba,” nitim.

Tᵾn Kᵾn Popᵾⱡ Kuⱡi Naⱡᵾm Wamp Ei Enim Nga Wamp Puⱡ Ei

49Ni kᵾn, Jon ndi, Jisas nga nitim ik nimbᵾ, punt ropa nimba mel, “Wu Nuim ye! Tᵾn ndi wu ti, kᵾndᵾrmᵾn ei, nim nga mbi ila, kur kit mbᵾ, nimba tᵾpa mundrum. Wu ei, tᵾn nga rᵾⱡaip ila mon. Ei nga, uⱡ itim ei, tᵾn ndi, kundpᵾn iti nᵾtangga mon!” nitmin. 50Wote Jisas ndi, Jon kᵾn kitip kᵾni wu kat kᵾn, kundpa nimba mel, “Wu ei mon ni nᵾnᵾi! Wamp ti, enim kᵾn popᵾⱡ kuⱡi naⱡᵾm wamp ei, enim nga wamp puⱡ ei ka!” nitim.

Sameriya Wamp Mbᵾ Ndi, Jisas Numan Ngui Nganggᵾrᵾng

51Wote Got ndi, Jisas muⱡ kona oⱡa tᵾmba ui ei, nondpa itim ila, Jisas elim nga numan ei, ronduⱡ pilpa, Jerusalem kona peng ou ila purum. 52Jisas elim akil tep uimp nimba ei nga wu mat, Sameriya kona ila kuimp tek puk, tᵾk kun etᵾk muⱡeing nimba, tᵾpa mundrᵾng. 53Wote, Sameriya kona ila wamp nimbᵾ ndi, Jisas tᵾk mek, enim nga kona ila pi nᵾpmᵾn nᵾk pᵾtᵾng. Ei nambuⱡ emel, Jisas ni, Jerusa-lem kona peng ou ila mba, purum ei pᵾtᵾng. 54Wote ni kᵾn, Jisas elim nga kitip kᵾni wu Jeims kᵾn, Jon raⱡ ndi, Sameriya wamp etᵾng uⱡ ni kandkᵾⱡ kᵾn, wote Jisas waldkᵾⱡ nᵾkᵾⱡ mel, “Wu Nuim ye! Nim pilkᵾn kapⱡa nana, tᵾn ndi, wi muⱡ ila ndip ti, mana wangga namina omba, uⱡ kit enmin wamp mbᵾ, ndip ndi, nomba mi tindangga?” nᵾtᵾnggil. 55Wote Jisas ndi, ropᵾl ropa wu raⱡ ik mura ngurum ila, en enim ping etᵾng kona ei kelik, wu ni kᵾⱡ kona tila elpa ping pilik purung.

Wamp Nam Ti Jisas Pep Romba

57Wote Jisas kᵾn, elim nga kitip kᵾni wu ni kᵾⱡ kᵾn, nombuⱡa mam ila puⱡina kᵾn, wu ti ndi omba, Jisas kundpa nimba mel, “Kona nant mbila nim pun mel, na nim pep rop uimp mint!” nitim. 58Wote, Jisas ndi pilpa, punt ropa nimba mel, “Owa rakra mbᵾ, mᵾi ila kut akᵾk petmin. Kᵾi mbᵾ mi manga rok petmin. Wote, Muⱡᵾl Wu Kupa ei nga peng kilanda mundᵾmba, kona ti mon!” nitim. 59Wote Jisas ndi, wu ni, kundpa nimba mel, “Nim na pep rokᵾn ui!” nitim. Wote wu ni ndi, Jisas kundpa nimba mel, “Wu Nuim ye! Nim ndi, na wak rokᵾn mundana, unt mbo na nga tipam ei, on etᵾp pendᵾp wamp,” nitim. 60Wote Jisas ndi, pᵾnt ropa nimba mel, “Ei mon! Wamp korung mbᵾ ndi, wamp koⱡung mbᵾ tᵾk on iting. Nim pukᵾn kona mbila, Got nga wamp tᵾpa mumuk rui uⱡ ei nga wamp mbᵾ, ik mbo indᵾn pi!” nitim. 61Wote, wu ti ndi, Jisas kundpa nimba mel, “Wu Nuim ye! Na nim pep rop uimp ei nga, wote nim ndi, kapⱡa nana kᵾn, na unt mbo, na nga wamp mbᵾ, rawe etᵾp pendᵾp, wote wamp,” nitim. 62Wote Jisas ndi, wu ni, kundpa nimba mel, “Wamp ti ndi, kongun ru koipa ru kan ei, pep rui narᵾpa kona elpa mbᵾ, mong tᵾm ndam, ru koipa kit mondᵾmba. Uⱡ ni mel wamp ei, Got nga wamp tᵾpa mumuk rui kongun ei, etmba mel kapⱡa mon!” nitim.